АКАФИСТ

 преподобному и Богоносному отцу нашему

 Паисию Величковскому

 

Кондак 1

Избрáнный от Воеводы сил небесных Господа Иисуса Христа, покрови́телю земли Молдавстей и преди́вне чудотворче, теплый о нас молитвенниче и великий старче, преподобне отче наш Паисие, прославля́юще просла́вльшаго тя Господа, воспева́ем ти похва́льная. Ты же, яко имéяй дерзновение ко Господу, от всяких нас бед свободи́, да зовем ти: Радуйся, Паисие, старчества духовнаго в стране на́шея возроди́телю.

 

Икос 1

Ангелов Творец и Господь сил из чрева матери твоея́ предъизбрá тя, богоно́сне отче Паисие, ибо от младенчества к Богу вéлие раче́ние имел, пренебре́гши земная, и плоть нося, о плоти не раде́л еси. Темже и всели́ся в тя Пресвятый Дух, Его же тя обиталище быти уве́девше, вопием ти:

Радуйся, родителей благочестивых плод целому́дренныя чистоты.

Радуйся, благовонное цветение их подвига веры и неувяда́емыя красоты́.

Радуйся, Ангелу хранителю твоему уподóбитися благоволи́вый.

Радуйся, родителей твоих и наставников свое́ю кро́тостию и покорностию удиви́вый.

Радуйся, от младенчества ко и́ноческому послушанию себе приугото́вивый.

Радуйся, душу свою младенческую к Богу устреми́вый.

Радуйся, словом Божиим, а́ки сладким медом, разум юности твоея́ услади́вый.

Радуйся, сердце твое воле Божией всецело покори́вый.

Радуйся, Паисие, старчества духовнаго в стране на́шея возродителю.

 

Кондак 2

Разумева́ти ища́ го́рняя, до́льняя вся до́лу оставил еси́, темже и мудрости века сего обуча́тися отре́клся еси́, да о́ное не разлучи́т тя от любве́ Божией, Ему же ныне пое́ши непрестанно: Аллилуиа.

 

Икос 2

О́троку еще ти су́щу, блаженне Паисие, желанием плени́ тя Христос странствия и нищеты Своея́, темже и ма́тернее противление нивочто́же вмени́л еси́ и к подвигу и́ночества устремился еси. Мы же, зря́ще таковое твое благоволение с радостию глаголем си́це:

Радуйся, в видимых явлениях природы невидимаго Бога созерца́вый.

Радуйся, тишину и уединение возлюби́вый.

Радуйся, от лет отроческих к Богу раче́ние име́вый.

Радуйся, мирски́я прелести от юности твоея́ презре́вый.

Радуйся, любве ради Господа, дом отеческий оста́вивый.

Радуйся, вся красная мира сего нивочтоже вмени́вый.

Радуйся, на крыле́х трезве́ния к Богу возлете́вый.

Радуйся, сердце свое горе́ име́вый.

Радуйся, Паисие, старчества духовнаго в стране на́шея возродителю.

 

Кондак 3

От юности твоея́ Господеви работати возжеле́в и наставлений ища, обители многи обтекл еси, Афо́нския Святыя Горы достигл еси, Богу поя: Аллилуиа.

 

Икос 3

Телесную презрев слабость, отче, к по́двигом устремился еси́, ве́дяще я́ко в немощи сила Божия совершается. Сего ради умиляемся душею о толи́ком горении любве твоея́ ко Всещедрому Богу и умильно зовем ти:

Радуйся, крест свой на ра́мена подъя́вый и Христу после́довавый.

Радуйся, узкий и прискорбный путь монашескаго жития во́лею избра́вый.

Радуйся, вспять николи́же обрати́выйся.

Радуйся, святоотеческими писа́ньми просвети́выйся.

Радуйся, смирением своим духа гордыни низложи́вый.

Радуйся, во́ине Христов непобедимый.

Радуйся, и́ноческаго равноангельнаго жития ревнителю.

Радуйся, безмолвия древних Богоносных отцев подражателю.

Радуйся, Паисие, старчества духовнаго в стране на́шея возродителю.

 

Кондак 4

Бурю мирска́го жития и страстей волны преше́д, обрел еси́ тихое пристанище, и в пустыню Афонскую вселився, неленостно поработал еси́ Христу во мно́зе долготерпении. Сего ради ди́вно просла́ви тя Господь, Ему же ныне предстоя, со ангелы воспева́еши: Аллилуиа.

 

Икос 4

Ви́дяще твое и́ноческое преуспея́ние, Богом науче́нный старец Поляномеру́льский Василий облече́ тя в мантию, и сподо́би тя Подвигоположник Христос благодати ангельскаго чина приобщи́тися. Мы же ви́дяще сие Божие к тебе благоволение, с ра́достию вопие́м ти:

Радуйся, всем сердцем Бога возлюби́вый.

Радуйся, все́ю душею ему послужи́вый.

Радуйся, Паисие, детству тезоимени́тый.

Радуйся, по́двигов монашеских во́ине до́бльственный.

Радуйся, любве́ Евангельския сокровище.

Радуйся, Духа Святаго вместилище.

Радуйся, в принятии ангельскаго чина завершение ча́яний твоих узре́вый.

Радуйся, небесному покровителю своему, Паисию Великому, подража́вый.

Радуйся, Паисие, старчества духовнаго в стране на́шея возродителю.

 

Кондак 5

Смирением, постом, наипаче же непрестанною молитвою на стра́сти плотски́я крепко ополчился еси, преподобне, до́ндеже плоть твою ду́хови поработи́л еси и сего ра́ди ныне предстои́ши с лики ангел престолу Пресвятыя Троицы, вы́ну воспевая: Аллилуиа.

 

Икос 5

Возсия́ в тебе обильно благодать Божия, егда́ ты чин ангельский восприя́л. Дух же твой, прия́тый во объятия Отча, тебе отве́рстая, блаженство неизреченное вкуси́. Таково́му Бо́жию о тебе произволе́нию радующеся, зовем ти:

Радуйся, Богом Отцем предъизбра́нный.

Радуйся, Богом Сыном искупле́нный.

Радуйся, Богом Духом Святым освяще́нный.

Радуйся, Господа паче всего возлюби́вый.

Радуйся, матерь ради Христа оста́вивый.

Радуйся, отвергший себе ради Господа Иисуса,

Радуйся, крест Христов на себе взе́мший.

Радуйся, вслед ему после́довавший.

Радуйся, Паисие, старчества духовнаго в стране на́шея возродителю.

 

Кондак 6

Боготечную звезду, к горнему Иерусалиму путеводя́щую и доброде́тельми светло сияющую, зря́ще тя, предивне Паисие, и́ноцы афонстии с любовью после́доваху тебе, внимающе твоему учению и взирающе на образ чистаго жития твоего, поуча́хуся взывати с тобою Богу: Аллилуиа.

 

Икос 6

Явился еси́ новый Пала́ма проти́ву новых варлаамствующих, Паисие свя́те, безмолствующих священное главо. О́нех убо буйство обличая, сих же известно утверждая, верных же всех научая умом в сердце молитися Богу. Мы же, тобою науче́ни, благодарно поем ти:

Радуйся, совершенную любовь ко Господу показа́вый.

Радуйся, память о Распятом присно во уме твоем содержа́вый.

Радуйся, молитву Иисусову усты непрестанно твори́вый.

Радуйся, возлюбленнаго тобою Иисуса вы́ну в сердце твоем носи́вый.

Радуйся, душу свою к Богу единому устреми́вый.

Радуйся, в молитве и богомыслии дни́е лет своих проводи́вый.

Радуйся, злых помыслов искоренителю.

Радуйся, добрых нравов насадителю.

Радуйся, Паисие, старчества духовнаго в стране на́шея возродителю.

 

Кондак 7.

Священства сан, его же прежде много бегал еси, человеколюбно прия́л еси и мудре учеников твоих руководил, Христу Пастыреначальнику подражал всеусердно, взем иго Его на себе и научи́вся от Него кротости и смирению, обрел еси покой души своей, зовущей присно: Аллилуиа.

 

Икос 7.

Возсия́л в возлюбленной Богом душе твоей блистающий истиннаго богове́дения свет, его же, со сла́достию внимающим и спасительному твоему учению вне́млющии, верно позна́ем я́ко и в единонадеся́тый час прише́дый, равный с древними Богоносными отцы динарий прия́л еси. Темже восхваляем тя си́це:

Радуйся, вместилище добродетелей.

Радуйся, достойное святыни жилище.

Радуйся, древним отце́м подражателю.

Радуйся, Православия ревнителю.

Радуйся, и́ноческую нищету и нестяжательность до конца храни́вый

Радуйся, душу твою Жениху Христу уневе́стивый.

Радуйся, сан священства, яко великий дар Божий прия́вый.

Радуйся, Богу совершенно угоди́вый.

Радуйся, Паисие, старчества духовнаго в стране на́шея возродителю.

 

Кондак 8

Хотя Человеколюбец Господь, да не сокрыт будет светильник добродетелей твоих, но да светит всему миру, изведе́ тя из афо́нстей пустыни на подвиг возрождения духовнаго старчества в земли Молдавстей. Сему Бо́жию промышлению дивя́щеся, благодарно зовем Богу: Аллилуиа.

 

Икос 8

Во обители Драгоми́рнстей, а́може пресели́лся преподо́бне, не восхоте́л еси́ оста́тися под державою иноверных австрийских царей, в богохрани́мей обители Се́кулстей вселился, под покровительством православнаго молдавскаго господаря. Мы же тя, возродителя духовнаго старчества и просветителя земли Молдавстей ве́дяще, взываем си́це:

Радуйся, пастырю наш добрый.

Радуйся, помо́щниче наш скорый.

Радуйся, звездо, показу́ющая солнце правды.

Радуйся, заре божественнаго света.

Радуйся, твердый сто́лпе и́ночества.

Радуйся, образ долготерпения, смирения и постничества.

Радуйся, земли Молдавстей просветителю.

Радуйся, обители на́шея небесный покровителю.

Радуйся, Паисие, старчества духовнаго в стране на́шея возродителю.

 

Кондак 9

Толи́ко умно́жишася чада твоя, преподо́бне, яко не возмощи́ им во обители Се́кульстей вмести́тися, тогда, Богом движимый архипастырь церкви Молдавския богомудрый митрополит Гавриил, избра́ тя во игумена Ня́мецкия Лавры, иде́же с бра́тиею твое́ю пресели́вся, хвалу принесл еси Богу: Аллилуиа.

 

Икос 9

Древней Ня́мецстей оби́тели дарова́ тя Господь, мудраго Старца и добраго пастыря, неусыпно о словеснем стаде своем пеку́щагося и о благолепии обители ревнующаго. Сего ради сла́вяще тя и братию твою, взываем:

Радуйся, яко отец чадолюбивый чад своих по пути спасения в Царствие Небесное води́вый.

Радуйся, жаждавших вступи́ти на путь и́ноческий с любовью во обитель приима́вый.

Радуйся, провинившихся и́ноков увеща́ньми своими к слезному раска́янию приводи́вый.

Радуйся, яко пастырь добрый житие́м своим братии пример подвига монашескаго подава́вый.

Радуйся, за спасение их душу свою положи́ти готовый.

Радуйся, монашескаго жития скорби с радостию прие́мый.

Радуйся, с благоговением и великим страхом безкровную жертву приноси́вый.

Радуйся, Ня́мецкую икону Пресвятыя Богородицы, яко чистейшую святыню, благоговейно почита́вый.

Радуйся, Паисие, старчества духовнаго в стране на́шея возродителю.

 

Кондак 10

Странник и пришлец на земли был еси, преподобне, обаче Господь от лет младенческих избра́ тя, я́ко угодника Своего, житие́м бо и богодухновенными писа́ньми твоими Господу усердно послужи́л еси. Мы же хвалу возсылающе ко благоде́ющему тебе Богу, поем: Аллилуиа.

 

Икос 10

Весь добродетелей испо́лненный, воистину был еси́ во плоти ангел, и́ноцех пришедших к тебе с любовью принимая, на путь покаяния наставляя, непрестанней молитве и плачу сердечному научая. Сего ради мы, духовныя чада твоя, взываем ти:

Радуйся, в чисту жертву Богови не то́чию плоть, но и душу всю принесы́й.

Радуйся, всего себе на служение Богу преда́вый.

Радуйся, и́ноков пресветлая красото́.

Радуйся, безмо́лствующих похвало́.

Радуйся, уедине́ннаго жития́ добрый ревни́телю.

Радуйся, послушания нелицемерный рачи́телю.

Радуйся, избра́ниче Христов преблаже́нне.

Радуйся, Богом данный нам заступниче непреобори́ме.

Радуйся, Паисие, старчества духовнаго в стране на́шея возроди́телю.

 

Кондак 11

Хотя достойным образом соверши́ти подвиг, возло́женный на тя Богом, пе́рвее укреплял еси́ свою душу чтением святоотеческих писаний, та́же почу́вствовав ве́лию пользу из того проистекающую, не обленился еси́ быти списателем богодухновенных творений древних отцев, с ними же ныне в невечернем свете лику́еши, воспевая просла́вльшему тя Богу: Аллилуиа.

 

Икос 11

Скорый помощник и уте́шитель был еси́ ученико́м твоим, преподобне, писа́ньми и уче́ньми твоими их утешая, дух ободря́я и вразумля́я. Сего ради и возглаша́ют ти вси чту́щии богодухновенныя творения твоя:

Радуйся, источник златоструйный.

Радуйся, цевни́це духовная, Духа Святаго испо́лненная.

Радуйся, новый Богослове, огненными словесы́ твоими умы многих Фаво́рским светом просвети́вый.

Радуйся, писа́ньми твоими души и сердца наши умили́вый.

Радуйся, подвиги и труды подвижников древних в богомудрых творе́ниях твоих изобрази́вый.

Радуйся, в житии́ твоем всецело им подража́вый.

Радуйся, верный делателю вертогра́да Христова.

Радуйся, мона́шествующих похвало́ и слава.

Радуйся, Паисие, старчества духовнаго в стране на́шея возродителю.

 

Кондак 12

Приспе́вшу твоему празднику, преподобне отче наш Паисие, весе́лия днесь духовнаго исполняемся вси, верно чту́щия тя лю́дие во стране́х Молдавстей и Российстей, и во Святей Горе Афонстей, молитвы непрестанными почитающе тя учителя. Ныне же предстоя престолу Царя Славы, моли́ся о нас, да твоими молитвами спаса́еми, с тобою купно воспоем Богу: Аллилуиа.

 

Икос 12

Светильник великий земли Молдавстей в жизни своей был еси, Паисие богомудре, и сего ради дарова́ти всеблагий Господь кончину праведную и просла́ви тя на небесех. Просим тя, испроси и нам, грешным, христианскую кончину жития нашего, добрый ответ на страшнем Суди́щи Христове и Царствия Небеснаго насле́дие, да зовем ти радостно:

Радуйся, Господу твоему до конца послужи́вый.

Радуйся, кончину твою предуве́девый.

Радуйся, к сонму избранных Божиих сопричте́нный.

Радуйся, воздая́ние от Бога восприе́мый.

Радуйся, с ангелами водвори́выйся.

Радуйся, со святыми вселивыйся.

Радуйся, тленную жизнь на нетленную премени́вый.

Радуйся, венцем нетленным от Христа уве́нчанный.

Радуйся, Паисие, старчества духовнаго в стране на́шея возродителю.

 

Кондак 13

О, предивный уго́дниче Христов, великий старче и чудотворче, преподобне отче наш Паисие, молитвы Иисусовой изря́дный де́лателю и Добротолюбия богомудрый списа́телю, не остави нас, чад твоих, присно заблужда́ющих и дел благочестия не иму́щих. Посети нас твое́ю любовию, возста́ви нас от духовнаго разслабления и к чтению отеческих писаний обрати, да тобою храни́ми, сподобимся во свете непристу́пнем Христа Царя Славы непрестанно воспева́ти пе́снею: Аллилуиа, Аллилуиа, Аллилуиа. (Кондак читается трижды)

 

Икос 1

Ангелов Творец и Господь сил из чрева матери твоея́ предъизбра́ тя, богоно́сне отче Паисие, ибо от младенчества к Богу ве́лие раче́ние имел, пренебре́гши земная, и плоть нося, о плоти не раде́л еси. Те́мже и вселися в тя Пресвятый Дух, Егоже тя обита́лище быти уве́девше, вопием ти:

Радуйся, родителей благочестивых плод целому́дренныя чистоты́.

Радуйся, благовонное цветение их подвига веры и неувяда́емыя красоты́.

Радуйся, Ангелу хранителю твоему уподо́битися благоволи́вый.

Радуйся, родителей твоих и наставников свое́ю кро́тостию и поко́рностию удиви́вый.

Радуйся, от младенчества ко и́ноческому послушанию себе приугото́вивый.

Радуйся, душу свою младенческую к Богу устреми́вый.

Радуйся, словом Божиим, а́ки сладким медом, разум юности твоея́ услади́вый.

Радуйся, сердце твое воле Божией всецело покори́вый.

Радуйся, Паисие, старчества духовнаго в стране на́шея возродителю.

 

Кондак 1

Избра́нный от Воеводы сил небесных Господа Иисуса Христа, покровителю земли Молдавстей и преди́вне чудотворче, теплый о нас моли́твенниче и великий старче, преподобне отче наш Паисие, прославля́юще просла́вльшаго тя Господа, воспева́ем ти похвальная. Ты же, я́ко име́яй дерзновение ко Господу, от всяких нас бед свободи́, да зове́м ти: Радуйся, Паисие, старчества духовнаго в стране на́шея возродителю.

 

Молитва

О, изрядный уго́дниче Христов, великий старче, преподобне отче наш Паисие, во дни земна́го жития твоего мно́гия на путь правый наставивый и в Царствие Небесное му́дре руководи́вый, ско́рбныя уте́шивый, па́дающим подава́вый руку помощи и всем любезен, ми́лостив и сострада́телен отец бы́вый. Ты ныне в Небесней пребыва́яй светлости, наипа́че умножа́еши любовь твою к нам не́мощным, в море житейском бе́дствующим и искушаемым ду́хом злобы и страстя́ми своими, воюю́щими на дух. Сего ра́ди смиренно мо́лим тя, отче святы́й, по да́нней тебе от Бога благодати, помози́ нам твори́ти волю Господню в простоте сердца и смирении, возгори́ в сердцах наших страх Божий и научи нас моли́тися, наде́ятися, верить, терпеть, прощать и любить, искушения же вра́жия победить и свирепое страсте́й море изсушить, да та́ко немо́кренно про́йдем житейскую пучину и предста́тельством твоим ко Господу сподобимся достигнуть обетова́нного нам Царствия Небеснаго, сла́вяще Безначальную Троицу, Отца и Сына и Святаго Духа ныне и присно, и во веки веков. Аминь.

Тропарь, Глас 2

Стра́нен быв на земли́, Небеснаго Отечества достигл еси, преподобне отче наш Паисие, Добротолюбия подви́жниче, верных научил еси́ ум к Богу возводи́ти и сердцем к нему взыва́ти: Господи, Иисусе Христе, Сы́не Божий, помилуй мя, грешнаго.

 

Кондак, Глас 2:

Избра́нный и́ноческаго жития ревни́телю, я́ко пчела многотрудная, писа́ньми оте́ческими ду́ши наша снабдил еси́, коего́ждо наставляя на путь спасения. Сего ради зовем ти: Радуйся, Паисие, старчества духовнаго в стране на́шея возроди́телю.